Mahadangi Kakawalan
Sabulan sudah ulun nulis blog di blogdetik ngini, biar sabuting dua tulisan ulun nang makai bahasa banua, ulun rasa mayu ai gasan nampaiakan pada ulun ni urang Banjar jua. Sabujurnya ulun nulis makai bahasa Banjar ni kadanya kadeda untingan pang, kahandak ulun tu ada jua bubuhan Banjar atawa Kalimantan Selatan nang baelang bapadah inya urang Banjar jua, apalagi mun sampai kawa kita baisi grup nang kaya bagian nya.
Ada jua pang saikung bapander di tulisan ulun nang panambaian, batakun ulun urang mana, ulun padahi ai ulun ni urang Martapura, ulun takuni inya jua urang mana, harau kada sing cungulan lagi. Hadang hadang sampai wayahini kada timbul-timbul jua. Damati ulun di blogdetik banyak jua urang banua nang bisi blog disini. Handak mancarii tia kada bisa, ulun itihi grup nang ada dasar kadeda jua.
Rasa bahiri banar ai malihat bubuhan daerah lain ada bisi grup banua inya, kada banyak jua pang grup nang ada disini, kada saban banua an jua tuh ada, tapi kanapa kah ulun rasa handak banar malihat tulisan Banjar mampang di barisan grup blogdetik. Handak ulun nang baulah grup tia ulun kada sanggup maharagunya, iya jadi mahadang kakawalan ja nang baulah.
Bisa jua pang ulun aja nang kada titihi pada ada jua buhan Banjar nang manulis disini, kaluai pas tulisan nya mampang di headline pas ulun kada buka internet. Bisa jua kalo kaitu.
Biar kada mahir ulun umpat grup-grup kaitu, tapi ulun katuju maitihi. Jadi rancak ulun tahu aja grup bubuhan mana nang pina tabanyak kawalannya.
Mudahan ai kena-kena ada jua nang baulah, siapa kah nang maulah asal ulun taitihi aja insya Allah ( ni insya Allah uran alim, kada insya Allah urang biasa) ulun umpat jua di grup ngitu.
